ਚੋਹਲਾ ਸਾਹਿਬ/ਤਰਨਤਾਰਨ, 05 ਫਰਵਰੀ (ਰਕੇਸ਼ ਨਈਅਰ) : ਐਤਵਾਰ ਦੇਰ ਸ਼ਾਮ ਨੂੰ ਇਥੋਂ ਦੇ ਬਜ਼ਾਰ ਬਾਬਾ ਸ਼ਾਹੂ ਸ਼ਾਹ ਵਿਖੇ ‘ਗੋਪੀ ਆਟੋ ਰਿਪੇਅਰ’ ਦੀ ਦੁਕਾਨ ਨੂੰ ਲੱਗੀ ਭਿਆਨਕ ਅੱਗ ਨਾਲ ਜਿਥੇ ਗਾਹਕਾਂ ਦੇ ਸਰਵਿਸ ਕਰਵਾਉਣ ਲਈ ਆਏ ਮੋਟਰਸਾਈਕਲ ਅਤੇ ਐਕਟਿਵਾ ਸੜ ਕੇ ਸੁਆਹ ਹੋ ਗਏ ਉਥੇ ਹੀ ਦੁਕਾਨ ਅੰਦਰ ਹਵਾ ਭਰਨ ਵਾਲੀ ਮਸ਼ੀਨ ਸਮੇਤ ਸਪੇਅਰ ਪਾਰਟਸ ਦਾ ਸਮਾਨ ਵੀ ਅੱਗ ਦੀ ਲਪੇਟ ਵਿੱਚ ਆਉਣ ਨਾਲ ਦੁਕਾਨ ਮਾਲਕ ਦਾ ਕਾਫੀ ਮਾਲੀ ਨੁਕਸਾਨ ਹੋ ਗਿਆ।
ਦੁਕਾਨ ਮਾਲਕ ਗੁਰਪ੍ਰੀਤ ਸਿੰਘ ਗੋਪੀ ਨੇ ਦੱਸਿਆ ਕਿ ਉਹ ਐਤਵਾਰ ਨੂੰ ਆਪਣੀ ਦੁਕਾਨ ਬੰਦ ਰੱਖਦਾ ਹੈ। ਐਤਵਾਰ ਦੇਰ ਸ਼ਾਮ ਨੂੰ ਨੇੜਲੇ ਦੁਕਾਨਦਾਰਾਂ ਦਾ ਉਸਨੂੰ ਫੋਨ ਆਇਆ ਕਿ ਉਸਦੀ ਦੁਕਾਨ ਅੰਦਰੋਂ ਕਾਫੀ ਧੂਆਂ ਨਿਕਲ ਰਿਹਾ ਹੈ।ਜਦ ਉਸਨੇ ਦੁਕਾਨ ਖੋਲ੍ਹੀ ਤਾਂ ਅੱਗ ਕਾਫੀ ਤੇਜ਼ ਹੋਣ ਕਰਕੇ ਦੁਕਾਨ ਅੰਦਰ ਗਾਹਕਾਂ ਦੇ ਸਰਵਿਸ ਕਰਵਾਉਣ ਲਈ ਆਏ ਮੋਟਰਸਾਈਕਲ ਅਤੇ ਐਕਟਿਵਾ ਸੜ ਕੇ ਸੁਆਹ ਹੋ ਚੁੱਕੇ ਸਨ।ਇਸ ਤੋਂ ਇਲਾਵਾ ਦੁਕਾਨ ਵਿੱਚ ਹਵਾ ਭਰਨ ਵਾਲੀ ਮਸ਼ੀਨ ਅਤੇ ਸਪੇਅਰ ਪਾਰਟਸ ਦਾ ਸਮਾਂ ਵੀ ਸੜ ਕੇ ਸੁਆਹ ਹੋ ਗਿਆ। ਨੇੜਲੇ ਦੁਕਾਨਦਾਰਾਂ ਵਲੋਂ ਕਾਫੀ ਜਦੋ-ਜਹਿਦ ਤੋਂ ਬਾਅਦ ਪਾਣੀ ਨਾਲ ਅੱਗ ‘ਤੇ ਕਾਬੂ ਪਾਇਆ ਗਿਆ।
ਦੁਕਾਨ ਮਾਲਕ ਨੇ ਦੱਸਿਆ ਕਰਜ਼ਾ ਚੁੱਕ ਕੇ ਇੱਕ ਦਿਨ ਪਹਿਲਾਂ ਹੀ ਉਹ ਦੁਕਾਨ ‘ਤੇ ਵੇਚਣ ਲਈ ਨਵਾਂ ਸਮਾਨ ਖ੍ਰੀਦ ਕੇ ਲਿਆਇਆ ਸੀ,ਉਹ ਵੀ ਅੱਗ ਦੀ ਲਪੇਟ ਵਿੱਚ ਆਉਣ ਨਾਲ ਸੜ ਕੇ ਸੁਆਹ ਹੋ ਗਿਆ।ਇਸ ਸੰਬੰਧੀ ਪੁਲਸ ਥਾਣਾ ਚੋਹਲਾ ਸਾਹਿਬ ਵਿਖੇ ਸੂਚਿਤ ਕੀਤਾ ਗਿਆ ਹੈ। ਪੀੜਤ ਦੁਕਾਨਦਾਰ ਵਲੋਂ ਸਰਕਾਰ ਕੋਲੋਂ ਮੁਆਵਜ਼ੇ ਦੀ ਮੰਗ ਕੀਤੀ ਗਈ ਹੈ ਤਾਂ ਜ਼ੋ ਉਹ ਫਿਰ ਤੋਂ ਆਪਣਾ ਕਾਰੋਬਾਰ ਚਲਾ ਸਕੇ।ਅੱਗ ਲੱਗਣ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ।
